მინოქსიდილის დაბალი დოზებით პერორალური თერაპიის ეფექტურობა COVID-19-ის შემდგომ განვითარებული ტელოგენური ალოპეციის მკურნალობაში.

  Dr. C.D. Villarreal-Villarreal-სა  მისი კოლეგების მიერ გამოქვეყნდა რეტროსპექტიული კვლევა, რომელშიც შეფასებულია მინოქსიდილის დაბალი დოზებით პერორალური მიღების ეფექტურობა ტელოგენური ალოპეციის სამკურნალოდ, რომელიც ასოცირებულია გადატანილ COVID-19 ინფექციასთან ( პოსტ-კოვიდური ტელოგენური ალოპეცია – PTA).  

კვლევის აქტუალობა 
ტელოგენური ალოპეცია ერთ-ერთი ყველაზე ხშირი ტიპის თმის ცვენაა, რომელიც უმეტესად ვითარდება ორგანიზმის სტრესული მდგომარეობების, ინფექციების, ჰორმონული დისბალანსისა და სხვა ფაქტორების ფონზე. COVID-19 პანდემიის პერიოდში გამოვლინდა, რომ SARS-CoV-2 ინფექციის გადატანა შესაძლოა გახდეს ტელოგენური ალოპეციის მნიშვნელოვანი გამომწვევი ფაქტორი.  


  ავტორები აღნიშნავენ, რომ მიუხედავად იმისა, რომ პოსტ-კოვიდური ტელოგენური ალოპეცია უმეტეს შემთხვევაში თვითგანკურნებად მდგომარეობას წარმოადგენს, თმის ინტენსიური ცვენა ხშირად იწვევს ძლიერ ფსიქოემოციურ სტრესს, შფოთვასა და ცხოვრების ხარისხის გაუარესებას. შესაბამისად, კლინიკურად აქტუალური გახდა ისეთი თერაპიული მიდგომების მოძიება, რომლებიც დააჩქარებს თმის აღდგენას და შეამცირებს პაციენტთა დისკომფორტს.  

კვლევის დიზაინი და მეთოდოლოგია კვლევა მოიცავდა 69 ზრდასრულ პაციენტს, რომლებსაც დაესვათ ტელოგენური ალოპეციის დიაგნოზი 2020 წლის დეკემბრიდან 2022 წლის ოქტომბრის ჩათვლით პერიოდში. კვლევის ჯგუფის შემადგენლობა:
50 ქალი (72,5%)
19 მამაკაცი (27,5%)
ყველა მონაწილეს ადრე გადატანილი ჰქონდა SARS-CoV-2 ინფექცია და კვლევის პერიოდში იღებდა მინოქსიდილს პერორალურად, დაბალი დოზებით. მკურნალობის ეფექტურობის შეფასება განხორციელდა სპეციალური სკალის – Hair Shedding Score (HSS) – გამოყენებით, რომელიც წარმოადგენს თმის ცვენის რაოდენობრივი შეფასების ინსტრუმენტს.  

კლინიკური მონაცემები კვლევაში მონაწილეთა შორის COVID-19 ინფექციის მიმდინარეობა განაწილდა შემდეგნაირად:
მსუბუქი ან საშუალო სიმძიმის ფორმა – 79,7%
მძიმე ფორმა – 11,5%
უსიმპტომო მიმდინარეობა – 8,7%
საშუალო დრო ,SARS-CoV-2 ინფექციის გადატანიდან პოსტ-კოვიდური ტელოგენური ალოპეციის დიაგნოზის დასმამდე, შეადგენდა 117 დღეს (დიაპაზონი: 80–181 დღე), რაც შეესაბამება ტელოგენური ფაზის ბიოლოგიურ მახასიათებლებს.

   შედეგები მინოქსიდილით მკურნალობის დაწყების შემდეგ დაფიქსირდა HSS მაჩვენებლის თანმიმდევრული და სტატისტიკურად სარწმუნო შემცირება:
მე-2 ვიზიტზე: HSS – 5 [5–6]; P < 0,001
მე-3 ვიზიტზე: HSS – 4 [3–5]; P < 0,001
მე-4 ვიზიტზე: HSS – 2 [1–2]; P < 0,001
აღნიშნული დინამიკა მიუთითებს თმის ცვენის ინტენსივობის მნიშვნელოვან და პროგრესულ შემცირებაზე მკურნალობის ფონზე. პოსტ-კოვიდური ტელოგენური ალოპეციის სიმპტომების სრული ან პრაქტიკულად სრული რეგრესიის საშუალო დრო შეადგენდა 93 დღეს (დიაპაზონი: 55–148 დღე). კვლევის განმავლობაში არ დაფიქსირებულა სერიოზული გვერდითი მოვლენები, რაც ხაზს უსვამს თერაპიის უსაფრთხო პროფილს.

   დასკვნები კვლევის ავტორებმა დაასკვნეს, რომ:
მინოქსიდილის დაბალი დოზებით პერორალური მიღება წარმოადგენს ეფექტურ თერაპიულ სტრატეგიას COVID-19-თან ასოცირებული ტელოგენური ალოპეციის მკურნალობაში;
თერაპია აჩქარებს თმის ცვენის შემცირებას და აღდგენის პროცესს;
მკურნალობა ხასიათდება კარგი ტოლერანტობითა და უსაფრთხოებით;
აღნიშნული მიდგომა შეიძლება განხილულ იქნას როგორც პერსპექტიული ალტერნატივა პოსტ-კოვიდური თმის ცვენის მართვაში.
კლინიკური მნიშვნელობა კვლევის შედეგები განსაკუთრებით მნიშვნელოვანია ყოველდღიური დერმატოლოგიური პრაქტიკისთვის, ვინაიდან პოსტ-კოვიდური ტელოგენური ალოპეცია წარმოადგენს სულ უფრო გავრცელებულ პრობლემას. მინოქსიდილის პერორალური დაბალდოზიანი რეჟიმი შეიძლება იქცეს რაციონალურ და ეფექტურ ინსტრუმენტად პაციენტთა მართვის ალგორითმში, განსაკუთრებით იმ შემთხვევებში, როდესაც ადგილობრივი თერაპია არასაკმარისია.

სტატია მოამზადა: ქეთი გიგინეიშვილმა